O moich futrzokach

Do Goroli co nic nie rozumieją słownik !

Pozůr, bydzie wic! Taki wprowadzyni do tematyki. teroz bydzie pytani a na kůniec opowiadanio odpowiedź! Czy wiycie jaki je kůmplet wypoczynkowy od barana?

Jo mioł takigo fajnego psa bez poranoście lot! Taki bakocz ale mioł rychtyk serce! My go mieli od moij kuzynki bo jeij suka za fes lotała po Niedobczycach i sie zaroz pora psich galanůw znodło. Nie wiym wiela ich było ale dużo bo ty ij młode też miały wiela kolorůw! Tyn můj to był taki czorno-bioły. Jak ůn był mały to był taki fajny! Szyrszy niż długszy. Potym jak wyrůs to wyglůndoł rychtyk jak pies a ni jak misiek. ůn mie rod bajsoł po rynkach ale jak wyrůs to nawet jakech mioł leberka w rynce (a leberka to ůn mioł rod, jak kożde jedzyni) to mie nigdy nie użal yno tak lizoł po rynce ażech mu jům doł. A potym jak dziynkowoł! No, bez przesady z tym dziynkowanim, jo znům tako dziołcha co sie z psym całuje! Fuj! Gorzyj niż w Holandii!

Zawsze rodech chodziył z psym po łůnkach. yno żech mu sie przedtym musioł dac wylotać aby sie zasapoł bo jak ni to targoł za lańcuch aże targoł! Jo go jeszcze umioł pociůngnyć ale jak tak szoł z mamům to jům kludziył kaj popadnie, nie szło go utrzimać! A nie dej Boże jak ujrzoł jakigo sornika, jak sie za nim puściył to żeś go můg wołać, prziszoł dopiyro jak zgłodnioł. Niestety, w 2003 (pisza w kierym bo co roku byc musioł zmiyniać jakbych padoł że np. dwa lata nazod abo łůńskigo roku) ůn zacznył kuckać. Nie wiym czamu ale kuckoł, żodyn dochtůr od psůw mu poradzić nie umioł. Roz rano moja mama cicho klupie do pokoju i drżůncym głosym godo: "podziwej sie do okna". Jo już wiedzioł co je grane bez dziwanio sie. Moj pies leżoł na placu i sie nie ruszoł.

Sie biydok musioł w nocy zakuckać na śmierć. A tak mie sie zdowało że kucko w nocy! Yno jo nic nie robiył bo tak było co noc. Tůż z płaczkami w oczach my sie z nim udali w ostatnio podrůż na naszo cicho, spokojno łůnka i tam my go zakopali a miejsce kaj ůn je zakryli kamiyniami. Nawet moj fater kiery bez robota na grubie sie zrobiył fest twordy i nie do po sobie poznać jaki mo akurat uczucia padoł "bydzie nům brakować Nera" (bo sie Nero mianowoł). No i dwa lata późnij czyli dokładnie dzisiej, 15 lipca 2005) my szli na pole z fatrym i mutrom i mama roz woło: "dziwejciesie, tam kaj je Nero pochowany to rośnie mały důmb"! I jo sie naprowda ucieszył. Bo do nieba to idům yny ludzie, i to jak sům dobrzi, a nawet najlepsze i najukochańsze psy jak Nero nikaj nie idům bo dusze ni majům. Ale za to jak sie udo to te małe drzewko, kiere teroz mo możnej z 15 cyntymetrow, kiejś bydzie miało z 40 metrůw abo i wiyncyj. I zawsze jak tam půńda to se spůmna moigo Nera.

Żeby tyn wůntek o zwierzyntach nie był taki smutny to teroz połosprowiom coś o tym, jak my kiejś mieli barany. Ta gadzina w przeciwieństwie do psa była fest gupio. Můj fater z nimi rod godoł (najczynścij im godoł że sům łone gupi) i ich cioroł poskiym ale nic to nie dało rady, baran i tak był gupi bo sie yny dziwoł i godoł "beeee". Jo jako taki knajtek, moznej z 10 lot stary toch szoł wieczorym po barany na łůnka (to jak moi rodzice jeszcze nie byli na pyndzyji yno jeszcze fater fedrowoł pod ziymiom na Emie a mama tez na grubie ale na Rymerze i nie pod ziymiům) i miołech ich przikludzić du dom. A jo sie ich nie bol boch wiedzioł że mom yno dać pozůr coby mie palcow kaj nie połomały jak byda ich tzimac za keta. No i jakżech ni mioł siyły to jakech ich z kolikůw pospuszczoł to kety żech nie utrzimoł, to mie nie roz smykały po polu. Ale jakech potym trocha podrůs (i zmůndrzoł z czym sie moi rodzice do dzisiej nie zgodzajům) to żech mioł zabawa: rozszwůngować barany a potym ich dogůnić i przideptować keta. Byście mogli widzieć jak ich zawsze sztopło! Nic yno kulac sie ze śmiychu!

Se zaroz nie myślcie żech je taki sadysta bo jo już z tego wyros. A naprowda umiołech ubliżać zwierzyntom, jakech kotowi w piwnicy prziwiůnzoł keta (nie za dłůgo) do pasa a potym go lynkoł tak coby uciyk bez okiynko, to jak ůn podskoczyl to w połowie wyskoku w lufcie go sztopło (bo keta była za krůtko) to nie wiedzioł borok co z nim je! A o ciepaniu kamiyniami abo cylowaniu ze szlojdra do kur to ani nie godům. Ale to je nic, moj kamrat (teroz poważny informatyk, łociec, i łeb rodziny) to nawet takimi rzutkami co sie ciepie do celu cylowoł w kury. I jak roz jedna trefiył i chcioł ij ta rzutka wyrwać to kury nie umioł dogonić. Dopiyro za dwa dni jego fater sie zdziwiył czamu jakos kura leży pod płotym z rzutkom w kuprze i nie dycho. Jo żałuja żech kiejś ni mioł kamery boch sie skrod do dwůch moich kotůw na placu i żech ryknył na ni. I jak łone sztartły to sie ani nie dziwały kaj lecům i jak leciały to sie sklupły łepami! Miołech uciecha. Abo inkszym razym můj fater wołoł moigo kota :Pimpus, Pimpuś" bo mu niůs mlyko. Ale Pimpuś nie prziszoł. No i pora godzin půźnij idzie můj fater kole chałupy i słyszy taki ciche miałczyni. Słůcho uważnij, miałczyni słyszy z rynny! Co sie okozało? Jo żech wcis moigo kota z půł metra do rynny a że ůn mioł tako szyroko żić to nazod nie doł rady wylyźć. No tak ze dwie godziny był w rynnie bo jo ło nic blank zapůmnioł! Nie wiym co mie do łepy strzelyło, o wiela dobrze pamiyntom toch chcioł wiedzieć co zrobi kot jak deszcz zacznie padać i woda poleci rynnom. Były kiejś próby z jakij najniższej wysokości kto do rada sie przekopyrtnyć w lufcie na cztyry łapy, ciepani kota bez okiynko ze szłopca (to nie jo yny moja drugo siostra, starszo siedym lot odymie), zabawy małymi kaczkami, walki sumo z prosiynciym (bo prosioka tez my mieli), cylowani balym w psa (z nogi oczywiście), magic dance zaś z kotym, kůmpiele kota... Ciynżko pokuta za to byda mieć! Ale jo był za młody coby to zrozumieć, ni?

No dobra, czas na rozwiůnzani zagadki, tyn komplet odpoczynkowy od barana to je KOLIK, HOLSZPANT I KETA, dobre, ni?