Jako to kiejś było a jako je dzisio

Do Goroli co nic nie rozumieją słownik !

Nimażech jeszcze stary ale rod se spominom co sie to kiejś robiyło. Hoby jak my kiejś w podstawowie z kamratym zicherongi wybiyli. My mieli miec jakis sprawdzian, chyba z biologie, a my fest tego przedmiotu nie lubiyli. Jo tam jeszcze mioł jakiś przizwoite ocyny ale on sie nerwowoł kożdego razu. Tóz on zmiarkowoł że coś by trzabyło przeszkrobać. Przinios z chałupy dwa śrubokrynty i wraziył ich do sztekra a potym ciepnył na to gwozdek. Ze sztekra sie zakopciyło ale sztrom był dalij. Moj kamrat sie nie poddoł - zaś wraziył śrubokrynty yno teraz ze szaga. Teroz sie już w cołkij szkole zrobiyło cima. Niestety, my długo nie byli radzi bo naszo rechtorka padała że i tak sie bydymy uczyć. Dobrze że sie nie podziwała na szteker bo był blank bronzowy i sie jeszcze kopciył. Latoś tela śniega napadało że kożdy godo że takij zimy nie pamiynce. A jo pamiyntom jak kiejś było tela śniega że my nawet z chałupy nie umiely wylyźć bo zafujane były dźwiyrze i wszystko naokoło. Dobrze że my wtedy mieli moc krałzów z ogorkami, swojski tomaty i pora miechow zimioków. A jak już szło przejechać bez droga to było tak kylzawo że kole moij chałupy co chwila jakiś auto wykolybło sie do rantu. Jak my sie roz poszli z fatrym tam podziwać to roz nawet sie wykopyrtła ciynżarowa z jajcami i sie bez zadni dźwiyrze wylywała tako smażonka. By to widziały te kury co sie na te jajca kupry naciongały to by ich herszlag chyciył!

Do dzisiej moi najlepsze kamraty to ci z podstawowy. W gimplu to już było trocha goroli a na studiach to do wszystkich było za daleko. Ale torcha sie posmiyniało. Jeszcze pora lot nazod było fajnie. Kumplowało sie pora chłopa i sztyjc chodziyli łoni razym na dyski abo do knajp, we fusbal grali i o roztomańtych gupotach też pogodali. Ezi była haja to też umieli pociongnyć z otwartej abo z misia, a jak wioli to wszyscy razym.

Yno że potym sie to posmiyniało. Nikierzi sie hajtli i sie teroz spod pieluchow nie umiom wykopać. A jeich baby ich nikaj nie chcom puścić yno ich trzimiom choby psa na za krotkim lańcuchu. Nawet jak se synki chcom trocha drinknyć to ich frela sie krziwo dziwajom abo zaroz robiom butel. Dyć jak oni sie bojom baby spytać czy mogom bez nij wylyźć z chałupy? Mie by było gańba! Kaj ich honor, duma? Inkszi zaś wyjechali do Rajchu i jak przijadom to yno do frizjera, auto naprawić (w Faterlandzie to im sie nie kali) abo na świynta. Tesno im je o Polska, trocha ich przijechało nazod na stałe, ale inksi ni, bo tam majom robota.

Rozech z jednym z takich polskich Niemcow (tak nie możecie przi nich godać bo im sie to nie podobo) i inkszym kamratym (tym co te zicherongi wygoroł) smykali sie po wsi. Jak ni ma co robić to gupoty chodzom po łebie. Wtedy było tak samo. A że on mioł basior hoby bonclok i mu tam fest wlezie to wyżłopoł pora piwsk i pora kielonkow gorzoły. Przideptalimy do knajpy jeszcze na chwila i tam sie nasz "freund" doprawiył. Ledwo my wyleźli na luft to nim trocha pociepało i sie wykopyrtnył na zola i zostoł sztywny leżeć. Du dom my mieli kajś z kilometer, poł dwanostej w nocy, my by też już do auta nie poradziyli sie wtranżolić. Ni ma co, trzabyło go we dwóch kludzić do chałupy. Masy mioł tela co nas dwóch (teroz on też je też taki jak jo) i my sie zmachali zanim my go zakludziyli. Jo nie wiym, ale z godzina my sie telepali po drodze. Toż kiery z was by doł rada smykać we dwóch dwa spocone i naprute cynty kiere jeszcze coś mranczały bez syn? Ale jo też nie godom, to boł i je dalij moj najlepszy kamrat i nie żałuja żech go nie zostawiył w rancie spać.