Jo w Rajchu

Do Goroli co nic nie rozumieją słownik !

Godejcie co chcecie, ale Niymce to sům Niymce. Niby tak fest bliski ślůnskim sercom ale... do mie zawsze to bydům ONI a nie MY. Ale je o czym porozprowiać. Zaczna od takigo wica (możnej to ni ma yny wic yno rychtyk prowda?):

godo Francik do Alojza: "Ty, Alojz, wiysz że jo widzioł takigo wielkigo szczura, długszego niż na meter?" - "Ni, fulosz mie cygůnie jedyn, przeca to ni może być prowda!" - "Ale jo go widzioł w Niymcach!" - "Aaaa, jaaa, jak w Niymcach to je to prowda..."

Za kůmuny to była rychtyk prowda. Jak u nas w sklepach ludzie sie biyli o paczka kawy abo stoli w kolejce za starym miynsym to kiery był w Rajchu to sie nadziwić nie umioł że tam wszytko je w sklepach! A za łebka to jak do kogoś krewni przisłali paczka z Rajchu to był to gość! Kożdy sie do niego uśmiychoł żeby yno dostać guma do żucio abo dostać polizać bůnbůna! A wszyscy handlowali prospektami z aut, i kożdy sie chwolył nimi.

Tůż wyjyżdżali roztomajci ludzie, nojwiyncyj dochtorůw, inżynierůw abo inkszej ślůnskij intyligyncji. Ale wielu s nich se nie poradziyło w Niymcach. Tukej aktywni miyszkańcy, tam czasami musieli użyć za zapomoga abo robić bele co, taki roboty, kierych żodyn prowdziwy Niymiec nie chcioł robić.

Můj nojlepszy kamrat też wyjechoł. Ale ůn se tam doł rada. Nie łoszprowioł yno z Polokami ale sie zaroz skůmplowoł z Niymcami i to mu festy pomogło. tam sie uczůł, tam studiowoł i ůn tam rychtyk do czegoś doszoł. Co mie sie podobo, on jednak zawsze godo że je Polokiym. I mu sie czasym ścigo za Polskům i kumplami. Tóż też co roku nas odwiydzo i je wtedy fajnie.

Jo też sie kiejś do niego przejechoł. Znaczy sie byłech u niego pora razy ale piyrwszy roz zaroz po maturze. Rychtyk były to wtedy moi najlepsze wakacje! Tam w Niymcach toch sie tarabaniył po jeich geszeftach i oczy cieszůł, a we wieczůr to sie kajś wylazło "na miasto". Ale żech sie zdziwiył, że jakżech chcioł coś głośnij pedzieć to mie zaroz můj kamrat uciszoł. Ponoć styknie że ktoś trocha butluje to zaroz przijyżdżo policyjo i cie spisuje. Tůż mie sie to tez podobo bo porzůndek lubia! A w mieście wszystki dachy taki same, nie tak jak u nas że kożdy se robi jak chce, a potym ni ma to na nic podane! Abo mie sie jeszcze podobało, że we sklepach abo na ulicy sie wszyscy witajom s tobům, nawet jak cie nie znajům, a jak sie yno przibliżysz do pasůw na drůdze to zaroz auta stowajům, a kierowcy sie dziwajům co chcesz zrobić.

No ale ni ma wszystko tam taki fajne. Jakżech bajsnůł tyn ich chlyb z jakůmś kiełbasům, toch już był pojedzůny. Chobych plastik jod! Dyć tyn chlyb to ůni chyba z wyngla i poliuretanu robiům abo co! Ale co tam, przinajmnij żech schudnył. Co jeszcze mie sie nie podobało? A, już wiym, tam kobiyt nie puszczali przodym we dźwiyrzach, a půnoć w robocie też sie ich fest szteluje. Mie sie to nie podobo, tůżech przy kożdej okazji ucył Niymcůw jako sie majům zachowywać w stosunku do kobiyt. Cych kogo nauczůł, tego nie wiym. A jakżech pokozoł moij familiji zdjyncia z Rajchu, to zaroz padali "a czamu tam ni ma kwoitkůw?" No ja, jak Niymiec przidzie nazod z roboty to sie niczego nie chyci yno lygnie zaroz przed telewizorym. Nie to co u nas na Ślůnsku, że kożdo gospodyni pora godzin dziynnie dubie w ogrůdku i potym latym je piyknie.

Na koniec musza pedzieć, że to już nie te Niymce co kiejś! Szkoda! Zapytocie czamu? A bo młode Niymce majom teraz tako moda, żeby jak najmynij być... Niymcami! I bez to słuchajům zagraniczne zespoły, już nie som tak punktualni jak ich ůmy, a za půrzondkiym też już tak nie sům. To bydzie poczůntek końca tych Niymiec! To bydzie jeszcze jedyn kraj jakich pełno w Europie, zamerykanizowany i... zturczony! Hitler to był diobli najduch, a teraz to sie w grobie przewraco jak widzi wiela Turkůw i inkszych auslanderůw je w Rajchu, abo że jak Niymce grajům we fusbal to połowa ich drużyny je urodzono kaj indzij! Naprowda nie wiym, co s tego bydzie, ale już w ramach "poprawności politycznej" nawet najbardzij katolicki (południowe) landy Niymiec robiům sie coroz bardzij "bezbarwne" i bezbożne. I jeszcze jedyn problym: DDRowcy - yno by sie wadziyli jak to im je źle w kapitalizmie, ale teroz ci bezrobotni sie majom z tymi wszytskimi zapomogami lepij niż za kůmuny jak robiyli!

Tůżech w sumie rod przijechoł nazod na nasz Ślůnsk, bo yno tukej mům prawdziwych kamratůw co majům czas pogodać, yno tukej sům naprowda gryfne dziołchy a ni jakiś tam zmutowane prosioki futrowane na tanim jedzyniu z nimieckigo Aldika. Wreszcie tu je moja ziymia i tu chca zostać na zawsze!